المشاركات
وش أبيض لابس الطرحة
زي آية منورة بيطل
زي ليلة القدر والفاتحة
اللي من قبل الندى صابحة
كان دعاها ابتهال الفل
ربنا للطيبين أوحى
السلام الهادي والفرحة
الإيمان اللي يقف للذل
الصمود القادر اللي احتمل
خنقة الجبروت وقهر السنين
هي كانت نسمة ولا جبل
يابناة الفجر يابنايين
رد عني الفجر في المعتقل
والضحى الواضح في ضي الجبين
أم صفوت هي أم الأمل
هي أمي وهي أم الكل
ياقريبة من السما والأرض
في ابتسامك ريحة المرضعة
خلي بيني وبينك المرسال
هاتف الشعب اللي دايما وجب
يارئيسة في مجمع الأمثال
قالك الموال عن اللي انكتب
عالجبين لازم تشوفه العين
ياعليمة بالشقا وبالحق
هما واحد ولا هما اتنين
كنت أسمع منك الكلمة
ألقى فيها بلسم الحكمة
ألقى فيها النسمة والنعمة
من نبات الحب سكر نبات
ياسعيدة بهالة المنجبات
قعديني في ضلك الممدود
قربيني من الجناح الودود
الزمن كامل وماله حدود
رجعيني لعام كذا وأربعين
أمشي زيك واعرف الحي دا
تاني حارة أنعطف عاليمين
أوصل البيت اللي في السيدة
اسمي فارس ولا اسمي أمين
في مطالع رحلتي المنشدة
يابناة الفجر يابنايين
أمكم قامت تلبي الندا
زودت عودي برعشة حنين
ثبتت قلبي أمام العدا
نورتني في الجهاد والفدا
علمتني احترام الحياة
كانت المعزوزة والمسعدة
ماسمعتش منها قولة آه
إلا مرة والتقي عيوني
عالرصيف الضُهر نسيوني
بيعاودني في سحابة غيام
يوم كأنه من غرَق الأيام
الهتاف انصد مش سامعه
والمكان ضيق ومش سايعه
كان وكان من بعد يوم الشباب
والزمن بيبدل الأسباب
كوبري عباس انفتح للمرور
والولاد اترحلوا (للطور)
شفت في عيونك دموع النور
راحت الدنيا في شبورة
زي حافر يضرب القورة
تنكسر في الجو أحلامي
دي فلسطين اللي مكسورة
والتاريخ اللي صبح دامي
والحبيب اللي صبح غايب
كانت الداخلية قدامي
كان لاظوغلي في ضهري يتتاوب
كنت مش لاقي الكلام هايب
السكون اللي اختلط بالنبض
ياقريبة من السما والأرض
في ابتسامك ريحة المرضعة
والتقينا في العذاب تاني
والهنا في المطرح الهاني
يوم اقول الموت أخف ويوم
ماكانتش الدنيا سايعاني
والتقينا في رحاب القوم
والتقينا في الشجر والطير
والتقينا في دفا العيلة
والشهادة في الشقا وفي الخير
كان نصيبنا معرّم الكيلة
طيبين عاللقمة نتكاتف
نشترك في الرؤية والهاتف
حتى في عز الشتا نصادف
من حنان الصيف مسا وليلة
والتقينا في الصنايعية
في عجايب ألف وردية
ريحي كتافك من الشيلة
دا اللي بيعيش الحوادث نهج
امسحي العرق الكريم النقي
اللي زهّر في النسيم وابتهج
مدي إيدك فوق عشان نتّقي
من شعاع الشمس ضي الوهج
التقينا وياما راح نلتقي
في سؤال وحياتنا هتجاوب
من هنا لآخر رمق فينا
في هلال بينور القارب
في ظلام نازل على المينا
في وداع المجهد الشاحب
في ميلاد وسبوع وتهنينة
في زمن من حسنه يتعاجب
أو زمن في بعضه بيعاتب
في انبساط الطبل والزينة
واحتمال الصبر والواجب
والمواكب في الصباح المبين
ادعي لولادك وقولي امين
يابناة الفجر يابنايينل
أمكم في الفجر دايما تعود
بعد ما تصلي تقول يامعين
ياإلهي القادر المعبود
بسألك من قلب شاعر سجين
رجع الوالد إلى المولود
سبت بكري ولادي لو يذكر
بالدموع تصرخ عيونه السود
والصغير عمره سبع اشهر
كان قمر أتقل من العنقود
أم صفوت تجمع العائلات
حضنها الواسع يضم عيالي
جنب ربات البيوت عاملات
ياللي اسمك في الضماير عالي
دقي عالأبواب وروحي وتعالي
عالجرايد دوري زي النحلة
ياللي اسمك في الضماير أعلى
من مقام الخصم قدامك
نظرة واحدة توزني الإنسان
بالذكاء النيّر الصاحي
تعرفي اللون اللي في عروقه
تنطقي بالحق واجب فرض
ياقريبة من السما والأرض
في ابتسامك ريحة المرضعة
لسا محتاجلك خدي بيدي
وامسحي اللي بيجري فوق خدي
انتي عارفة ليه كلامي حزين
وانتي شاهدة ياللي طبعك رزين
لسا لحم ودم لسا بشوف
لسا بسمع صرخة الملهوف
لسا عندي من المواجع خزين
عمر طافح من ليالي الهلاك
يابناة الفجر يابنايين
أمكم راحت تزوركم هناك
أم صفوت
مين بينده مين
الهوا بيخْبط على الشباك
قاعدة تسمع دربكات العجل
ايش يقول ولا محدش سأل
ايش يقول القطر لما يفوت
عالعطش والصخرة والحجرة
أرض من غير زرع من غير بيوت
ايش يقول القطر في الصحرا
اوعى حد يعيش وحد يموت
في المنافي (وليلة) الفقرا
او مع الشهدا ومع الشعرا
كلهم كانوا صراخ مكبوت
كلهم راحوا في قبر سكوت
ايش يقول القطر في العفرة
كل ما يعفّر وما يصفّر
عالواحات ان كنتي رايحة جديد
بجناحات ولا بسكة حديد
اسمعي في عجلي هدد وعديد
قلنا ياست الحبايب لأ
تسمعي القلب المناضل دق
مرة بالموال ومرة النشيد
كرّت المواعيد وغنينا
قال بيتداروا من التنهيد
قلنا طول الليل ما ونينا
وافتدينا النور بأغلى شهيد
معتقلنا اخضرّ بإيدينا
معتقلهم زي قطع الإيد
الإمام الحر في عينينا
ضهرهم في الأرض زي العبيد
هي مصر بعيدة يانينة
كل حاجة بيطلبوها بعيد
كله ضايع والكدد هيزيد
كل أيامهم نهارها شديد
والليالي كل واحد وحيد
كلنا في حضنك وتحت النظر
ربطة واحدة من ربيع الشجر
يا ام صفوت ياصباح العيد
وانفتحلك قلبي لما شعر
زي عين مبتحتملش الغمض
ياقريبة من السما والأرض
في ابتسامك ريحة المرضعة
اذكريني في ختام الدعا
وانتي رافعة ايديكي زي الكتاب
ربنا الهادي الرحيم استجاب
عشت في الحلم السعيد منتشي
حتى غنيت الزمان اللي كان
والعريس المعجباني مشي
في طريق الزفة زاهي الثياب
من ولادك يبقا هذا العريس
حط رجله في وشي ما بيختشي
أصلي من جنس التراب التعيس
شفت صاحب فضل ما له أنيس
واللي كان في السجن زي الأسد
لما شاف العضم (..) فسد
حتى خاف لا تصيبه عين الحسد
من ولادك من أبر البنين
آدي شاعر بالمحبة اكتفى
عايز الأيام تبطل انين
وانت يامحمد ويامصطفى
يابناة الفجر يابنايين
أمكم روح الوطن والوفا
ياأساس الإنسانية المتين
العيون اللي صاحبها غفا
ياترى تشوف العذاب الدفين
ولا تحلم بالحنان والدفا
ياسلام ما بعد منه سلام
طيبة ياقلوبنا ومسامحة
ازرعيلي في القمر قمحة
سنبلاتها تفسر الأحلام
واشرحيلي الجاية والرايحة
نوريلي آخر الصفحة
جمعيلي كلمة الأيام
أم صفوت أنتبه واصحى
ألتقي كل القلوب صالحة
والبشاير في الغيطان واضحة
التزَم آمَن خدم ضحى
وش أبيض لابس الطرحة
نهتدي بنوره
نهتدي بنوره ونسعى لبعض
يا قريبة من السما والأرض
في ابتسامك ريحة المرضعة
ليست هناك تعليقات:
إرسال تعليق