المشاركات
يا سامعين أبناء بلد واحده
تحت السما الواحده وفي البستان
من الكافوره تنقل العصفوره
على الغيطان للسنبله المضفوره
تكسر عيدان الميه فوق النافوره
فرط الحنان الفجر قال ياكريم
جت فى الودان كل الذنوب مغفوره
يا حامد استفتح بقلب سليم
النور مقسّم أحسن التقسيم
معنى المعانى ونزهة الأنظار
والشرق جاور فرن عم ابراهيم
طلع الرغيف والشمس والأزهار
أصل المعايش أصلها بالنهار
نادى المنادى ع الرطب والخضار
بحس أزين من أسامى الحريم
يا كل دى الجنه ودار النعيم
أهل الحرف والحمالين والتجار
فى دولة المماليك يشموا النسيم
وفى ألف ليله يطلعوا ألف رحله
مع الخيال وبيسألوا الكنز فين
ما بيعرفوش الكنز بين الأيدين
قولة حتوحشني وقولة حتحلى
تودع الشطّار بغمزة عين
والكدب أخضر فى الزمان القديم
كل التاريخ مكتوب بحبر أليم
وعشان نقول أمثال ونضربها
لابد من مقتول يجربها
يا حسرة العجبه فى إيد اليتيم
المصري هو الشاعر القايل
الناس بتاكل بعض، مش واكل
الناس ولاد الكار فى حب الحياه
قول للنفوس اللى بتطلب حكيم
إذا القمر بعتر عليها ضياه
من غير ما أفهم حاجه فى التنجيم
من غير ما اكون فلكى فى علم الهيئه
شافت عيونى فى الليالى الرايقه
بخت اللى باتوا كلهم مظاليم
ورجعت اقول مش راح تفكوا الرَّضَد
عن كنزكم غير ما يزول الحسد
ما بين ولاد الكار بإذن الرحيم
خلينا قلب وعين
بين السما والأرض
أقرب من الشفّتين
لبعض
الحب جاى ورايح
أخضر خفيف الجانح
طالق شبابه وفاتح
شباكه زى الايدين
خلينا قلب وعين
بين السما والأرض
أقرب من الشفّتين
لبعض
واللى فتنته فتنّى
وكان جميل التثنى
وانا الأمير المغنى
الله خلق الاتنين
نعيش حبايب حبايب
ولاعذول ولاتايب
تلات ليالي عجايب
وفاتوا منهم يومين
إحنا اليتيم واليتيمه
يا اهل البيوت القديمه
كل الحجاره كريمه
اللى تتاوي راسين
عايزين ماحدش يطرف
تحت النسيم المرفرف
نعيش لبعض ونعرف
حنية الوالدين
خلينا قلب وعين
بين السما والأرض
أقرب من الشفّتين
لبعض
قصيدة #الكنز - #فؤاد_حداد من ديوان (من نور الخيال وصنع الأجيال في تاريخ القاهرة)
ليست هناك تعليقات:
إرسال تعليق